О ПРОЄКТУ

Скупштина АП Войводини 2008. року прилапела Стратеґию за защиту од насилства у фамелиї и других формох родно заснованого насилства у АП Войводини за период од 2008. до 2012. рок. Стратеґия представяла перши стратеґийни документ у борби процив насилства над женами, нє лєм у АП Войводини, алє и у Републики Сербиї.

Дзекуюци потримовки Фонду Зєдинєних нацийох за онєможлївйованє насилства над женами, могли зме, нєпоштредно по прилапйованю Стратеґиї, такой почац з єй запровадзованьом. Будовали зме и ище вше будуєме всеоблапну систему за зоперанє насилства над женами – систему у хторей професионалки и професионалци цо заняти у институцийох можу женом дац найлєпшу можлїву защиту од насилства, систему у якей жени информовани о своїх правох и файтох потримовки на яки можу раховац. Тото цо жадаме витвориц то тото – же би ше у АП Войводини запровадзело нулту толеранцию на насилство у фамелиї и на шицки други форми родно заснованого насилства хтори ше третирує як потупйованє основних людских правох. Же бизме тото и витворели, робели зме у шицких штерацец пейцох општинох у АП Войводини, орґанизовали зме вецей як двасто обуки у хторих участвовали скоро три тисячи професионалки и професионалци зоз центрох за социялну роботу, полициї, судох, тужительства, здравства, школства, женских орґанизацийох. Орґанизовали зме кампанї же бизме пременєли патриярхални становиска и розширени стереотипи яки ище вше оправдую хлопске насилство над женами. Робели зме и з младима у цалей АП Войводини з цильом онєможлївиц насилство у будучносци. Запровадзовали зме виглєдованя же бизме цо лєпше спатрели специфичносци насилства над женами у АП Войводини и же би нашо активносци били засновани на сиґурних информацийох и конкретних потребох женох у АП Войводини. Цали час зме робели на умрежаваню институцийох, бо вериме же лєм така, всеоблапна система може дац адекватни одвит на факт же кажда треца жена у АП Войводини дожила физичне насилство, а кажда друга – психичне. Без огляду на шицки подняти активносци, вони нє достаточни за застановйованє насилства над женами. Нєобходне ше бориц и далєй на цо нас спозорюю и 10 жени хтори у АП Войводини забили їх партнере у 2013. року.

На основи посцигнутих резултатох, Покраїнски секретарият за привреду, обезпечованє роботи и ровноправносц полох 2013. року постал партнер цо задлужени за територию Войводини у рамикох проєкту „Интеґровани одвит на насилство у фамелиї у Сербиї“, хтори запровадзую UNDP, UNICEF и UN UN Women, у сотруднїцтве зоз Министерством роботи и социялней политики и Министерством просвити, науки и технолоґийного розвою.

Найзначнєйши активносци у рамикох проєкту „Интеґровани одвит на насилство у фамелиї у Сербиї“ унапрямени на:

  • потримовку у ришовню зложених случайох насилства у партнерских одношеньох през сотруднїцтво шицких релевантних институцийох и орґанизацийох на локалним уровню у дзешец вибраних општинох на териториї АП Войводини (Зренянин, Нови Бечей, Вершец, Панчево, Ковин, Сримска Митровица, Ириґ, Канїжа, Апатин, Бачка Тополя и Мали Идьош)
  • виробок або ревидованє спорозуменя о сотруднїцтве шицких службох у заєднїци, у складзе з Общим протоколом и окремнима протоколами о поступаню и сотруднїцтве установох, орґанох и орґанизацийох у ситуацийох насилства над женами у фамелиї и парнерских одношеньох, яки предвидзує розвой локалних спорозуменьох по марец 2014. року
  • орґанизованє основних и специялизованих едукацийох яки ше одноша на превенцию и защиту од насилства у фамелиї и хтори ше орґанизує у складзе з потребами службох
  • виробок новей Стратеґиї за превенцию и защиту од насилства у фамелиї и родно заснованого насилства у Войводини
  • виробок Програми за економске моцнєнє женох хтори прежили насилство
  • виробок Програми превенциї и защити од насилства женох з ранївих дружтвених ґрупох: Ромкиньох, женох з инвалидитетом, женох з валалских штредкох.