• Обща декларация ЗН о людских правох (1946)

  • Конвенция ЗН о елиминациї шицких формох дискриминациї женох (CEDAW) (U.N. Doc. А/34/46) и Обща препорука число 19. Комитету за елиминацию шицких формох дискриминациї женох (U.N.Doc. A/47/38) 1992 – вимагаю поднїманє шицких нєобходних мирох за елиминованє дискриминациї спрам женох и зоперанє насилства у фамелиї, уключуюци прилапйованє специфичней леґислативи о насилстве у фамелиї, виновних санкцийох за зробительох насилства, граждански правни лїки, превентивни и защитни мири

  • Декларация ЗН процив насилства над женами (А/Res/48/104) 1993 – конкретизує акциї хтори би держава мала подняц пре елиминованє насилства у фамелиї: одвитуюце виновне законодавство, розвиванє националних планох акциї, обезпечованє услугох и ресурсох за жени жертви насилства, обучованє и родну сензибилизацию явних службенїкох и обезпечованє ресурсох з буджету влади за борбу процив насилства у фамелиї

  • Резолуция Комисиї ЗН за людски права 2003/45, Елиминация насилства над женами (E/CN.4/2003/L.11/Add.4) – влади маю „афирмативну обовязку унапредзовац и щициц людски права женох и дзивчатох и муша з витирвалу уважну роботу онєможлївйовац, вишлїдзовац и карац шицки акти насилства над женами и дзивчатми“

  • Конвенция ЗН о правох дзецка (1989) – визначує же держави обовязни поднїмац „шицки одвитуюци законодавни, административни, социялни и образовни мири за защиту дзецка од шицких формох физичного и менталного насилства”

  • Пекинґска декларация и Платформа за акцию A/CONf.177/20, chap. I (1995) – у обласци насилства у фамелиї, як приоритетне питанє, препоручує превипитованє и ревизию законодавства и поднїманє других потребних мирох, з формованьом одвитуюцих механїзмох за обезпечованє защити од насилства у фамелиї шицким женом, хторе треба третировац як виновне дїло яке ше каре по закону (t. 124-126)

  • Препорука 1450 (2000) Парламентарней скупштини Совиту Европи о насилстве над женами у Европи – препоручує стварянє европскей програми за борбу процив насилства у фамелиї

  • Препорука 1582 (2002) Парламентарней скупштини Совиту Европи – стимулує держави члени „припознац же маю обовязку зоперац, вишлїдзовац и карац акти насилства у фамелиї и обезпечовац защиту жертвом”

  • Препорука 2002 (5) Комитету министрох Совиту Европи о защити женох од насилства – дефинує насилство у фамелиї як „… насилство хторе ше збува у фамелиї або ґаздовстве, уключуюци, медзи иншим, физичну и психичну аґресию, емоционалне и психичне малтретованє, силованє и сексуалне малтретованє, инцест, силованє супружнїка, стаємних або дочасних партнерох и нєвинчаних супружнїкох, виновни дїла яки зробени у мено чесци, обризованє ґениталийох и полних орґанох и други традицийни пракси яки чкодза женом, як цо то примушуюци одаванки” (чл. 1а)

  • Препорука 1681 (2004) Парламентарней скупштини Совиту Европи „Кампаня за борбу процив насилства над женами у Европи” – „Акутна природа того проблему муши примушиц держави члени Совиту Европи же би на насилство у фамелиї патрели як на национални политични приоритет и же би ше з нїм занїмали у ширшим политичним рамику, з учасцу влади, парламенту и цивилного дружтва. Держави члени маю обовязку под медзинародним правом нєпреривно и з увагу дїйствовац у поднїманю ефективних крочайох на застановйованю насилства над женами, уключуюци ту насилство у фамелиї и защиту жертвох. Кед нє жадаю буц одвичательни, держави муша поднїмац ефикасни мири за онєможлївйованє и каранє таких дїйох з боку приватних особох и щициц жертви” (чл. 2).

  • Конвенция Совиту Европи процив насилства над женами и насилства у фамелиї то найвсеоблапнєйши медзинародни контракт у тей обласци и представя перши и єдини реґионални (европски) правно обовязуюци инструмент у обласци насилства над женами. Конвенция ше одноши на шицки форми насилства над женами, уключуюци и насилство у фамелиї, хторе барз потрафя жени. Основни циль Конвенциї то защита женох од шицких формох насилства и застановйованє, процесуованє и елиминованє насилства над женами и насилства у фамелиї. Окрем тих, цилї Конвенциї облапяю и виробок всеоблапних рамикох, политикох и мирох защити и помоци шицким жертвом насилства над женами и насилства у фамелиї, як и зоперанє шицких формох дискриминациї женох и промоцию сущней єднакосци женох и хлопох. Република Сербия ратификовала Конвенцию 21.11. 2013. року.