СИҐУРНА ХИЖА

Сиґурни (безпечни) женски хижи то дочасни змесценя хтори наменєни шицким женом и їх дзецом хтори загрожени зоз физичним, сексуалним, психичним и економским насилством у фамелиї. Сиґурни женски хижи то форми дочасного змесценя за даванє защити и потримовки женом и дзецом у виходзеню зоз насилства. Сиґурни хижи ше находза на тайних локацийох, же би ше хасновательком обезпечела подполна безпечносц. У Войводини єст три сиґурни хижи – у Новим Садзе, Зомборе и Зренянину. Тоти сиґурни хижи наменєни и за жени хтори жию у других штредкох. Пребуванє у сиґурней хижи безплатне за хасновательки, а трошки їх пребуваня зноша локални општински управи.

Сиґурна женска хижа ма функцию защициц жену и оможлївиц єй же би ше склонєла з окруженя у хторим постояло насилство. Циль оможлївиц жени же би ше врацела ґу узвичаєному способу живота у заєднїци и дац єй можлївосц орґанизовац живот без насилства. На таки способ ше жену охрабрує же би ше поступнє знова уключела до заєднїци.

Як дойсц до Сиґурней хижи?

У случаю моменталного насилства, жени и дзеци ше урґентно змесцує до сиґурних женских хижох. У такей ситуациї нє нєобходне приложиц документацию хтора обовязна за приєм. Кед постої потреба за наглим приємом женох и дзецох до Сиґурней хижи, окончує ше урґентне змесцованє и у такей ситуациї нє нєобходне приложиц документацию хтора обовязна за приєм.

У случаю кед же ше нє роби о урґентним змесцованю жени, потенциялни хасновательки до дочасного змесценя Сиґурней женскей хижи приходза по утвердзеней процедури. Под тоту процедуру ше подрозумює витворйованє контактох зоз жену звонка Сиґурней хижи, а фахови тим Центру за социялну роботу, на основи интервюа зоз жену, окончує преценьованє о найадекватнєйшей файти помоци хтору єй потребне обезпечиц за даванє потримовки за виходзенє зоз насилства.

У прилапююцей станїци ше хасновательком обезпечує краткотирваце прилапянє и збриґованє, найдлужей дзешец днї, по утвердзованє одвитуюцей форми защити. У дочасним змесценю Сиґурней женскей хижи женом и дзецом оможлївене пребувац найдлужей шейсц мешаци и под час їх пребуваня жени и дзеци ше упознаваю зоз другима членми хижи, животним простором и окруженьом. У атмосфери сиґурносци, прилапйованя и потримовки, дава ше им можлївосц же би ше опущели, одпочинули, окрипели, же би достали увагу и урґентну помоц яка им потребна (медицинску, психолоґийну и другу файту помоци). У тей фази, хтора може тирвац кратко, жена и дзецко маю право на пестованє и право же би ше им нє поставяло питаня хтори ше одноша на самостойне ришованє зложених проблемох. Поступнє ше их упознава з потребами и вимаганями орґанизованя каждодньового живота. Детальнєйше ше их упознава зоз файту и способом даваня фаховей помоци хтору ше орґанизує у рамикох Сиґурней женскей хижи и хтору можу хасновац през индивидуалну и ґрупну роботу, рижни креативни роботнї або едукациї, у зависносци од материялно технїчних можлївосцох Сиґурней хижи и особних афинитетох, як и помоц у повязованю з другима институциями од значносци за ришованє їх проблемох (суд, правне совитованє, Центер за социялну роботу, здравствени установи, школа, полиция и др.). У случаю школского дзецка (зоз дошлєбодзеньом мацери) школу ше упознава зоз актуалну фамелийну ситуацию и фактом пребуваня у Сиґурней женскей хижи. Контакти медзи оцом и дзецми ше реґулує прейґ Општинского суда хтори приноши ришенє о оптималним моделу видзеня. Под час пребуваня хасновательки у дочасним змесценю ше периодично анализує посцигнути резултати и приноши одлуку чи нєобходне предлужиц пребуванє.

Критериюми за приєм

Основни критериюм за приєм жени до Сиґурней хижи то постоянє физичного, сексуалного, психичного, економского насилства. Критериюми тиж так одредзени и зоз ситуацию у хторей ше жена находзи (загроженосц од насилства и розполагаюци ресурси защити), як и з єй психофизичним станом.

До дочасного змесценя и прилапююцей станїци нє мож прияц особи хтори маю чежки психиятрийни охореня або маю предисторию психиятрийних поремеценьох, особи хтори зависни од алкоголу, дроґи або таблетох, умерено и чежше ментално нєдосц розвити особи, як анї особи хтори маю поремеценя у справованю, хтори би нарушовали функционованє дочасного змесценя и прилапююцей станїци.

Текст написани на основи информацийох о Сиґурней женскей хижи у Новим Садзе.

http://www.csrns.org.rs/sigurnakuca/sekcije