СОС ТЕЛЕФОНИ

СОС телефони наменєни женом (алє и другим особом) зоз искуством насилства и ту су же би Вам обезпечели потримовку, информациї о способох як можеце защициц себе и способох як можеце приявиц насилство.

При поволанки на СОС телефони можеце, кед жадаце, остац анонимни и нє мушице охабяц Вашо мено и презвиско, анї контакт податки.

Зоз поволанку на СОС телефони ше достава потримовку и информациї о защити од насилства у партнерских одношеньох.

Можеце наволац на гоч хтори СОС телефон без огляду на место у хторим жиєце.

Персонал хтори роби на СОС телефону творя обучени волонтерки и фаховкинї з рижних обласцох (психолоґиї, права, медицини и др.) хтори ту же би Вас вислухали, дали Вам емотивну потримовку и дали Вам информациї о можлївосцох за виходзенє зоз насилства. Вони ту же би потримали Вашо одлуки и помогли Вам ВИСЦ зоз кругу насилства!

Персонал на СОС телефону добре зна яки Вашо права кед у питаню насилство у партнерским одношеню, яки Вашо права хтори ше одноша на здравствену, правну и социялну заштиту и упознати є зоз процедурами яки поднїмаю инсистуциї и орґанизациї цо ше занїмаю зоз превенцию и защиту од насилства у фамелиї.

СОС телефони Вам можу обезпечиц информациї о институцийох хторим ше приявює насилство, дзе можеце приявиц насилство и на хтори числа телефонох.

Сиґурносц

Кед глєдаце помоц на телефон, хаснуйце явни телефон або телефон звонка Вашей хижи. У ситуацийох моменталного насилства, поволайце 92 - полицию. Попробуйце дознац дзе ше находзи найблїзши телефон же бисце у ситуациї насилства могли цо скорей поглєдац помоц.

Пре векшу безпечносц, кед волаце на СОС телефони:

  • Майце на розуме же кед хаснуєце телефон дома, числа телефонох хтори сце наволовали можу буц доступни на увид насилнїкови прейґ звиту мешачного телефонского рахунку. Аж и кед сце зохабели насилнїка пред тим як цо мешачни звит сцигнє, насилнїк може провадзиц телефонски числа хтори сце наволовали за помоц.
  • Попробуйце обезпечиц свой мобилни телефон. Роздумайце о можлївосци набавиц власни пред-пейд телефон за хтори насилнїк нє будзе знац, а зоз хторого сце годни окончовац довирлїви поволанки.
  • Керуйце бездротово телефони: кед волаце з Вашого телефона дома, хаснуйце фиксни телефон кед же го маце а нє бездротови або мобилни телефон. Поволанки зоз фиксного телефона чежше лоцировац и провадзиц.

 

Сос Женски центер

„Сос Женски центер” (дакеди Сос телефон за жени и дзеци жертви насилства Нови Сад) то нєвладова нєпрофитна орґанизация хтора ше занїма з превенцию и пошлїдками насилства у дружтве, з акцентом на фамелийне насилство. Наша орґанизация настала як проєкт Новосадского Женского Центру 08.03.2002. року, а як самостойне здруженє гражданох иснуєме од 27.10.2004. року.

„Сос Женски” центер» ма 40 активни волонтерки, преважно студенткинї и абсолвенткинї психолоґиї, педаґоґиї и права, а од того року маме и студенткинї зоз Медицинского факултету.

Роботни час “Сос Женског центру” кажди роботни дзень од 18 по 22 годзин, а нашо число телефона 021/422-740. У тим чаше ше нашо окреме едуковани волонтерки явяю на телефон и у розгварки даваю безплатну информативну, емоционалну и психосоциялну потримовку поволовачом. Можеце нас контактовац и прейґ мейлу sos.telefon@gmail.com, а од того року маме и сайт: www.sosns.org.rs, прейґ хторого нас тиж так можеце контактовац. Маме и активни профил на дружтвеней мрежи “Фейсбук”, як ище єдну можлївосц за контакт.

До своїх дїялносцох “Сос Женски центер” учишлює и особни стретнуца зоз женами хтори у ситуациї насилства. Тоти стретнуца, хтори тиж безплатни, запровадзую нашо професионално обучени консултанткинї, а заказує ше их на телефон (на исти телефон и у истим роботним чаше).

Уж штири роки практикуєме и парняцку едукацию зоз адолесцентами и адолесцентками у форми интерактивних роботньох хтори ше отримує по основних и штреднїх школох ширцом Войводини, а од нєдавно и Сербиї. Тоти роботнї, хтори представяю примарну превенцию насилства медзи младима и у адолесцентских вязох, тиж отримую нашо обучени едукаторки.

“Сос Женски центер” ма и свою ПР екипу хтора даскельо раз рочнє орґанизує промоциї у форми улїчних акцийох и зявйованє у медийох, пре дзвиганє свидомосци людзох на тему фамелийного насилства.

Наш телефон призначує на рочним уровню 400-600 поволанки. Доставали зме поволанки з Нового Саду, Войводини, Сербиї, Чарней Гори и Босни и Герцеґовини.

Цали час службу потримує Покраїнски секретарият за роботу, обезпечованє роботи и ровноправносц полох. Заключени протокол о сотруднїцтве зоз Центром за социялну роботу городу Нового Саду, та маме канцеларию у їх просторийох.

 

НВО “Женска Алтернатива” Зомбор

НВО “Женска Алтернатива” Зомбор уведла 2001. року. СОС телефон за жени з искуством насилства и других формох дискриминациї исти рок кед орґанизация основана. НВО “Женска Алтернатива” Зомбор дзешец роки контунуовано дава безплатну телефонску помоц потримовки женом з искуством насилства. Вецей як два тисячи жени питали таку файту помоци. Поволанки сцигую од женох зоз подруча општини Зомбор, алє и зоз значно ширшого подруча.

Роботни час телефонох кажди дзень од 16 по 22 годзин.

На телефону анґажовани фаховкинї хтори едуковани членїци НВО “Женска Алтернатива” Зомбор.

Розпорядок анґажованих фаховкиньох шлїдуюци:

  • Пондзелок, штварток и пияток – ПСИХОЛОҐИНЯ
  • Стреда ДОХТОРКА НЕУРОПСИХИЯТЕР
  • Вовторок ПРАВНЇЦА

СОС телефонска служба предвидзує, як провадзацу услугу, ИНДИВИДУАЛНЕ СОВИТОВАЛЇЩЕ, дзе ше шицким клиєнткиньом, на їх вимаганє, дава директну индивидуалну фахову помоц од психолоґинї, правнїци або дохторки. Найчастейше потребна черанка, сотруднїцтво и интердисциплинарни приступ тих фаховкиньох, бо проблематика комплексна и часто є лєм условно вязана за єден домен доминантней помоци.

У своєй роботи СОС телефон и провадзаце совитовалїще сотрудзую и по потреби поштредую за клиєнткинї у кругу других важних институцийох и службох у окруженю, у складзе зоз професийну етику.

ПРОФЕСИЙНА ЕТИКА РОБОТИ НА СОС ТЕЛЕФОНУ ґарантує особом хтори ше обрацаю за помоц анонимносц и чуванє тайносци податкох и подполну дискрецию на їх вимаганє, а источашнє и стандардизовану фаховосц, доступносц и етику стараня о клиєнткинї.

Жени зоз искуством насилства, жени у рижних кризних фамелийних и других социялних ситуацийох волаю пре цали спектер проблемох. Кажда анґажована фаховкиня у домену психолоґиї, права або медицини охрабрує жени же би без ганьби и чувства вини шлєбодно бешедовали о проблемох яки маю и з якима вони жию або їм блїзки особи, потримую их же би нє требали церпиц насилство, сексуалне малтретованє, мобинґ и други форми нєпочитованя своїх основних людских правох и же маю право на защиту и достоїнствени живот.

Доставаю порученє же их дахто розуми, прилапює, почитує, же им жада помогнуц найсц виход зоз нєвольох и церпеньох.

Правнїци даваю безплатну правну помоц тим чийо права загрожени. Помагаю им препознац форми дискриминациї и загроженосци и унапрямую их як вивершиц и витвориц свойо маєтни, економски, родительски и други права…

Психолоґинї их охрабрую же би виражели свойо потреби, думаня, чувства, же би посцигли емотивну стабилизацию у кризних ситуацийох, як и же би превозишли проблеми, потим и же би приношели одлуки и вибор за свою добробут и добробут своєй фамелиї. То витворюю з моцнєньом капацитету женох же би знова мали довирия до себе и до свойого живота, як и до других людзох и же би иншак поступали зоз проблемами, прейґ консултацийох, совитованьох и психотерапийох.

Дохторка неуропсихиятер, у телефонскей або индивидуланей совитодавней роботи, окончує трияжу основних здравствених указательох хтори потребни за защиту и пестованє особи хтора церпи сексуалне, психичне, економске або друге насилство, загрожованє або дискриминацию и окончує превентивну медицинску защиту.

Центер за потримовку женом, здруженє гражданкох и гражданох, Кикинда, Войводина, Сербия

Совитовалїще за правну и психосоциялну помоц женом хтори прецерпели насилство функционує у составе Центру за потримовку женом, як безплатна социялна услуга за шицки жени зоз териториї општини Кикинда.

Телефон Совитовалїща 0800 10 10 10.

Роботни час од 10 по 16 годзин (кажди роботни дзень). Поволанка на тото число безплатна за поволанки зоз фиксней и мобилней телефониї.
Жена, хторей потребна помоц, до Совтитовалїща може присц особнє або поволац на телефон. Тиж, питанє за фахово сотруднїци у совитовалїщу можеце поставиц на podrska1@open.telekom.rs.

Совитовалїще дава тоти услуги:

Правну помоц:

  • Упознаванє зоз правами и можлївосцами хтори дава наша правна система (Фамелийни закон, Виновни закон, Закон о роботи и под.)
  • Помоц при зазберованю документациї и доказох хтори олєгчую порушованє судского поступку (чи виновного, потупового або парнїчного) як и писанє тужби або поднєску
  • Повязованє хасновательки зоз Службу безплатней правней помоци у Општини Кикинда

Социялне совитованє

  • Даванє подполней информациї о правох жени у домену социялней защити и способох на яки тоти права мож витвориц (фамелийне право, право на МОП, на єдноразову помоц и подобне)
  • Даванє информацийох о можлївосцох за змесцованє до сиґурней хижи /склонїща, кед то потребне
  • Помоц при зазберованю документацию за витворйованє социялних и других правох

Психолоґийне совитованє
Услуга подрозумює индивидуалну совитодавну роботу и ґрупни искуствово тренинґи асертивносци. Циль совитодавней роботи то даванє емотивней потримовки и охраброванє за шлєбодне виражованє думкох и чувствох, пре злєпшанє общого психолоґийного стану жени.

Асертивни тренинґ
Циль ґрупних тренинґох то здобуванє схопносцох за одбрану своїх правох и виражованє думаня, чувствох и прешвеченьох на директни, щири и адекватни способ, без загрожованя правох другей особи.