POSETA LEKARU

Кед сце физично покалїчени, побити на белаво, подрапани, маце гирї хтори пошлїдок насилства, або кед вам насилство спричинєло моцне возбудзенє и уплївовало на ваш психични стан або загрожело вашу животну спокойносц, було би добре, по можлївосци такой, пойсц до дохтора (дежурного дохтора, до урґентного центру, шпиталю).

Важне вашо калїченя санировац. Алє важне достац и потвердзенє о калїченю, вашим психичним стану и загроженей животней спокойносци, цо вам послужи як важни доказ при защити ваших правох пред судом.

Важне же бисце дохторови указали шицки калїченя, подрапани и збелавени места на целу, гирї, аж и гевти найменши, поведли хто вас покалїчел, кеди, як, дзе и зоз чим вас покалїчел. Инсистуйце же би шицко тото унєсол до потвердзеня – увереня о калїченьох и описал ваш психични стан. Надпомнїце дохторови же вам то потребне як доказ при защити ваших правох, як и най шицки калїченя евидентує и до вашого здравственого картону. Важне и тото же би вам дохтор констатовал калїченя з назначеньом вашого мена, мена дохтора, печаца установи, датуму явяня, датуму калїченя и з детальним описом калїченьох (тото нє муши буц на лїкарским увереню хторе ше наплацує).

Кед сце жертва силованя (з боку партнера, супруга або другей познатей або нєпознатей особи) купанє/умиванє вироятно будзе перше цо пожадаце зробиц. Медзитим, було би барз добре кед би ше вам удало перше пойсц до дохтора, бо вам лїкарске уверенє будзе важни доказ у поступкох хтори можеце порушац пре защиту своїх правох, а з купаньом/умиваньом одстранїце докази хтори важни у судским поступку.

Запаметайце

Лїкарске уверенє вам важни доказ о насилстве и калїченьох.